وصفه ترطيب البشره
بصى كل اللى هتعمليه هتجيبى 2 معلقه كبيره عسل نحل مع 2 معلقه كبيره لبن حليب ونصف ليمونه وهتقلبى كل ده مع بعضه وتعملى ماسك للوش والرقبه لمده 10 دفايق بعدها هتغسلى وشك بمايه دافيه عادى خالص اعملى الوصفه دى مرتين كل اسبوع
فاهيتا فراخ
المكونات
نصف كيلو صدور فراخ بدون جلد او عظم
التتبيله الخاصه بالفاهيتا ودى عايزه كوبى وبست او ورقه عشان مش تتنسى ومش هعيدها تانى .
عصير واحده بصله كبيره
2 فص ثوم مفروم فرم ناعم جدا
نصف معلقه كزبره ناشفه
1 معلقه هوت صوص
عصير نصف برتقاله
1 معلقه زعتر
1 معلقه صويا صوص
1 معلقه دبس رمان
2 معلقه زيت سمسم ولو مش عندك حطى زيت زره
ملح وفلفل اسود
1 معلقه بابريكا
1 معلقه شطه بودر
1 معلقه كبيره خل
معلقه كاتشب
هضرب كل التتبيله دى مع بعضها وهقطع صدور الفراخ جوليان وهحطها فى التتبيله و هدخلها الثلاجه لمده ساعتين وبعدين اجهز
الباقى وهيكون عباره عن
3 فلفل الوان وبصله مقطعين شرائح
الطريقه
فى حله على النار او طاسه تكون سخنه جدا هحط شويه زيت بسيطه وبعدين هصفى الفراخ كويس من التتبيله وبعدين هحطها فى الطاسه مع التقليب كويس جدا بعد كده هحط البصل وهقلب كويس اوى لحد الفراخ متستوى معايا هحط فى الاخر الفلفل الالوان وبعد كده هرفعها من على النار واكون مجهز العيش التورتيلا اللذيذ واحط كميه من الفاهيتا وبعدين الف التورتيلا كويس واقدم لاسرتنا احلى واجمل فاهيتا
وبالهنا والشفا
طاجن فراخ بالكارى
جيبت فرحه حجمها 1500 جرام غسلتها وقطتعنها على 8 قطع بالعظم
تبلتها ملح وفلفل اسود وكركم ومسطرده وشويه زعتر وبعدين فى طاسه شوحتها كويس لحد ماخدت لون بعد كده جيبت طاجن وحطيت فيه بصله مفرومه مع معلقه ثوم بودره و 2 معلقه كبيره كارى بودره وحطيت الفراخ وكمان 1 جزره كبيره متقطعه اصابع وكوبايه كبيره مايه وع الفرن لمده 40 دقيقه وبالهنا والشفا اه ماتنسيش الليمون والبقدونس وانتى بتقدميه بيكون رائع
المكونات
4 بيضات
1 كوب كبير سكر
1 كيس فانيليا
1 كوب زيت
علبه خوخ كمبوت هناخد نصها نقطعه قطع صغيره وهنرميه فى عجينه الكيك والنص التانى هنحطه فى القالب ونصب عليه الكيك
1 معلقه كبيره بيكنج بودر
2 كوب دقيق
الطريقه
لو هتعمليها فى العجانه ماشى ولو مش عندك تقدرى تعمليها على ايديكى سهله جدا هتضربى البيض مع السكر والفانيليا كله مع بعضه لمده دقيقتين فى العجانه و 5 دقايق على ايديكى وممكن كمان فى الخلاط العادى بعد كده هتحطى قطع الخوخ الصغيره اللى قلنا عليها وبعدين الدقيق والبيكنج بودر وتقلبى والتقليب يكون فى اتجاه واحد زى ماقلنا قبل كده عشان مش تهبط معاكى هتجهزى قالب الكيك مدهون زيت او زبده مع رشه دقيق وتحطى فيها قطع الخوخ وتصبى فيه الخليط ده ويكون الفرن جاهز وسخن على درجه حراره 200 لمده نصف ساعه وبالهنا والشفا
المكونات
1 كيلو لبن حليب
1 علبه زبادى
1 معلقه لبن بودره
الطريقه وياريت يكون فى تركيز
هنغلى اللبن فى حمام مايه عارفين طبعا ازاى حمام مايه يعنى حله جواها مايه بتغلى على النار
وجوه الحله دى فى حله اصغر فيها اللبن وطبعا ده مهم جدا عشان اللبن لو اتغلى
مباشره ومقلبتهوش كتير هيعمل طعم شياط فى الزبادى ودى مشكله دايما بتقابلنا لما بنعمل زبادى فى البيت
طعم الشياط هنا مش بيكون موجود نهائى لانى غليت اللبن فى حمام مائى اول ما اللبن يغلى معايا
هرفعه من على النار وهحطه مباشره فى حمام ثلج وهنا انا بعمل تبريد مفاجىء عشان البكتيريا
اللى مش ماتت فى التسخين تموت فى التبريد المفاجىء ده مهم جدا لاطفالنا كده انا بحاول انى اضمن
زبادى صحى لاطفالنا ان شاء الله بعد كده يا جماعه هنقلب علبه الزبادى مع معلقه اللبن البودره ودى الاضافه
النهارده لان لبن البودره بيعمل نعومه فى الزبادى وبيخليه زى زبادى المصانع الكبيره بظبط مع معلقه لبن
من اللبن اللى بيبرد عندى وهقلبهم كويس وياريت يكون بمعلقه خشب او بمضرب سلك بعد كده
هيكون اللبن دافىء دخل على مرحله الدفء هضيف علبه الزبادى اللى ضربتها مع اللبن البودره ومعلقه اللبن
مع التقليب المستمر
بعد كده هعبى الزبادى فى علب عشان ابتدى التخمير
وده زى منتى عايزه تقدرى تولعى الفرن لمده عشر دقايق لحد مايسخن وتحطى الزبادى فيه وهو مطفى طبعا
لمده 6 ساعات وبعد كده تحطيه فى التلاجه لحد التقديم خلى بالك متشيليش الزبادى الا لما يكون قوامه كمل
فراخ توسكانا بالليمون
المكونات
هتكون فرخه كيلو نص وهتفتحى سلسله الظهر وتغسليها بمايه وخل
مكونات التتبيله بسيطه اوى
2 ليمونه على نصين
عصير 4 ليمونات
وكمان هنحتاج معلقه كبيره زيست الليمون يعنى هتاخدى قشر الليمون وتبشريه
ملح وفلفل اسود
1 معلقه كبيره روزمارى فريش
3 معلقه كبيره زيت زيتون
4 فص ثوم مفروم
1 معلقه زبده كبيره
معلقه صغيره زعتر بودره
الطريقه ولا اسهل
هتبلى الفراخ كويس اوى بالمكونات دى كلها وفى الصينيه البيركس هتحطى الفراخ وجنبها الليمون المتقطع وتدخليها الفرن على درجه حراره 170 لمده 45 دقيقه لحد ماتستوى وتاخد اللون ده وتقدميها بالهنا والشفا
سندوتش التورتيلا بالموز والنوتيلا
هتجيبى عيش تورتيلا وده نزلنا طريقته اكتر من مره هنا هتدهنى العيش زبده فول سودانى ولو مش عندك حطى زبده عاديه وبعد كده هتحطى طبقه من النوتيلا وموزه شرائح وكمان انا هنا ضيفت مارشيملو قطع بيكون طعمها هايل مع النوتيلا والموز بعد كده حطيت السندوتش فى التوستر لمده دقيقه عشان بقدمه سخن قدمت جنبه فراوله فريش وويبنج كريم من غير سكر انا عارفه ان السندوتش دسم جدا لكن هايل طاقه طول اليوم بالهنا والشفا
